Andiko: 2 Mambo ya Nyakati 20:20: “Wakaondoka asubuhi na mapema, wakaenda jangwani Tekoa; nao walipokuwa wakitoka, Yehoshafati akasimama, akasema, Nisikilizeni, enyi Yuda, nanyi mkaao Yerusalemu; mwaminini Bwana, Mungu wenu, nanyi mtathibitika; waaminini manabii wake, nanyi mtafanikiwa.” Ninaomba maisha yenu yajazwe upendo na baraka za Mungu. Sasa ningependa kushiriki nanyi neema kupitia ujumbe wenye kichwa “Nguvu ya Sifa.” Nitoe mfano kutoka katika Biblia. Katika 2 Mambo ya Nyakati sura ya 20 tunasoma kwamba Mfalme Yehoshafati wa ufalme wa kusini na watu wake walishambuliwa na muungano wa majeshi ya mataifa kadhaa ya kigeni. Yehoshafati alimtegemea Mungu na kumwomba kwa bidii, naye akawashinda.

Mfalme akawatangazia watu kwa ujasiri, “Mwaminini Bwana, Mungu wenu, nanyi mtathibitika; waaminini manabii wake, nanyi mtafanikiwa” (2 Mambo ya Nyakati 20:20). Kisha akawaweka waimbaji na watu waliomsifu Bwana wakiwa wamevaa mavazi matakatifu mbele ya jeshi. Kwa kweli, inaonekana jambo lisiloeleweka kuwaacha watu wanaomwimbia na kumsifu Bwana wakiwa wamevaa mavazi matakatifu waende mbele ya jeshi katikati ya uwanja wa vita mkali ambamo mishale inaruka kila upande.

Lakini 1 Samweli 17:47 inasema, “Vita ni vya Bwana, naye atawatia ninyi mikononi mwetu!” Mfalme Yehoshafati alilikumbuka ahadi hiyo na alijua kwamba wangeweza kushinda vita tu kwa kumpendeza Mungu; kwa hiyo, aliweza kuthubutu kufanya hivyo. Mara tu watu waliovaa mavazi matakatifu walipoanza kumwimbia Mungu, Mungu naye alianza kuwatendea kazi. Majeshi ya mataifa hayo kadhaa yakapigana yenyewe kwa yenyewe na yote yakaangamizwa. Kiroho, kuvaa mavazi matakatifu kwa watu hao kunamaanisha “kuutahiri moyo na kuutakasa.”

Mungu hatosheki na usafi wa mwonekano wa nje pekee. Huguswa na nyimbo tunazoimba kutoka moyoni na huzikubali kwa furaha tunapoondoa kila aina ya uovu mioyoni mwetu na kutakaswa. Kwa hiyo, sifa zitokazo kwa watu waliotakaswa zina nguvu kubwa katika vita vya kiroho. Nguvu za Mungu zikidhihirishwa kupitia sifa zetu, atafanya mara moja liwezekane jambo ambalo kwa uwezo wa kibinadamu haliwezekani kabisa.

Daudi alipompigia Mfalme Sauli kinubi alipokuwa akiteswa na pepo mchafu, pepo huyo alimwacha Sauli. Jambo hilo linaonyesha jinsi sifa za watu waliotakaswa zilivyo kuu na zenye nguvu.

Zaidi ya hayo, hata kama hujapewa wajibu wa kuimba sifa, unaweza kumtolea Mungu sifa zinazotoka katika moyo uliotakaswa. Kwa hiyo, unapomwimbia Mungu kutoka moyoni na kwa upendo katika ibada na maisha ya kila siku, atazikubali na kukupa matamanio ya moyo wako.

Kwa hiyo, ninaomba kila mmoja wenu atakaswe kikamilifu kama Mungu anavyotaka, ampendeze na kupokea matamanio ya moyo wake. Ninaomba haya katika jina la Bwana wetu Yesu Kristo!

    His Emeritus Bishop Dr. Jaerock Lee